БНХАУ-ын Шиань хотын Баруун хойд техникийн их сургуулийн (NPU) судалгааны баг хүн төрөлхтний түүхэнд анх удаа сансрын тойрог замд утасгүй, суулгац хэлбэрийн тархи-компьютерын интерфэйс (BCI) төхөөрөмжийг амжилттай туршсан байна. Энэхүү үйл явдал нь сансар судлал болон мэдрэлийн шинжлэх ухааны салбарт шинэ хуудас нээлээ.
Чан Хунлон, Жи Бовэнь нараар ахлуулсан эрдэмтдийн баг уг төхөөрөмжийг 2025 оны 12 дугаар сард тойрог замд илгээсэн юм. Сансрын бичил татах хүчний нөхцөлд ажилласан уг систем нь дараах чухал үр дүнгүүдийг үзүүлжээ:
Тасралтгүй бүртгэл: Хүний биеийн шингэнтэй ижил орчинд тархины цахилгаан бичлэгийн (EEG) дохиог ямар нэгэн тасалдалгүйгээр бүртгэж чадсан.
Тэсвэрлэх чадвар: Сансрын цацраг туяа болон гадны хүчтэй нөлөөллийг систем тогтвортой даван туулж, ажиллах чадвараа баталлаа.
Нарийвчлал: Шинэ төрлийн уян хатан электродууд нь тархины гадаргууг гэмтээхгүйгээр өндөр чанартай мэдээлэл дамжуулж байна.
Судалгааны багийн зохион бүтээсэн уян хатан электродын багц нь тархины зөөлөн эдэд төгс зохицон хэлбэрээ өөрчилдөгөөрөө онцлогтой.
"Шинэ төхөөрөмжийн бат бөх байдал нь ердийн металл электродуудаас хэдэн зуу дахин илүү бөгөөд соронзон резонансын дүрс оношилгооны (MRI) хүчтэй орчинд ч хэвийн ажиллах чадвартай" гэж эрдэмтэд онцолжээ.
Бичил татах хүч хүний тархины үйл ажиллагаанд хэрхэн нөлөөлдгийг судлах нь урт хугацааны сансрын нислэг үйлдэх нисгэгчдийн мэдрэлийн тогтолцоо, сэтгэцийн эрүүл мэндийг хамгаалахад нэн чухал юм. Энэхүү технологи нь ирээдүйд Ангараг гараг руу хийх нислэг зэрэг алс холын аяллын үед тархийг хянах гол хэрэгсэл болох ирээдүйтэй.
БНХАУ-ын Засгийн газар BCI технологийг стратегийн ач холбогдолтой үйлдвэрлэлийн жагсаалтад оруулсан.
2026 он гэхэд: Уг технологийг эрүүл мэнд, үйлдвэрлэл, өргөн хэрэглээний зах зээлд нэвтрүүлж эхэлнэ.
2030 он гэхэд: Аюулгүй, найдвартай аж үйлдвэрийн бүрэн экосистемийг бүрдүүлэхээр төлөвлөж байна.
