АНУ болон Хятад улс соронз, газрын ховор элементийн нийлүүлэлт болон боловсролын солилцооны хүрээнд шинэ хэлэлцээрт хүрлээ гэж Ерөнхийлөгч Дональд Трамп лхагва гарагт мэдэгдэв.
Түүний хэлснээр, хэлэлцээрийн хүрээнд Хятад улс АНУ-д газрын ховор элемент болон соронзыг нийлүүлэхээ зөвшөөрсөн бол АНУ-ын зүгээс Хятадын оюутнуудыг коллеж, их дээд сургуулиуддаа элсүүлэхийг зөвшөөрсөн байна.
“Бидний зүгээс 55 хувь, Хятадын талаас 10 хувийн татварыг тус тус ногдуулна. Харилцаа сайн байна!” хэмээн Ерөнхийлөгч Трамп өөрийн “Truth Social” хуудсандаа бичжээ. Тэрээр нэмэлт мэдээлэл өгөлгүй, хэлэлцээрийг өөрөө болон БНХАУ-ын дарга Ши Жиньпин нар эцэслэн батлах ёстойг онцолсон байна.
Цагаан ордны мэдээлснээр, АНУ-ын зүгээс Хятадын импортын бараанд дараах байдлаар нийт 55 хувийн татвар ногдуулж байгаа бөгөөд үүнд:
10% – суурь татвар (харилцан татварын үндсэн хэмжээ),
20% – фентанилын наймаатай холбоотой нэмэлт татвар,
25% – урьд нь ногдуулж байсан татварууд орж байна.
Харин Хятадын тал АНУ-ын бараанд 10 хувийн татвар ногдуулахаар тохиролцжээ.
Мягмар гарагт хоёр улсын худалдааны төлөөлөгчид уулзалт хийж, өмнө нь зогсоогоод байсан Хятадын газрын ховор металлын экспортын хязгаарлалтыг цуцлахаар тохиролцсон тухайгаа албан ёсоор мэдэгдсэн байна. Энэ нь өндөр технологи, батлан хамгаалах, ногоон эрчим хүчний салбарт чухал үүрэгтэй материалуудын нийлүүлэлтэд эерэг нөлөө үзүүлэх төлөвтэй байна.
